Du treng ein attest

Du må registrere deg hos kommunen og levere gyldig norsk prøvingsattest som viser at det ikkje er nokon hindringar for giftarmålet. Norske par får vanlegvis attesten sin raskt. Men viss den eine eller begge er utanlandske statsborgarar, kan det ta opptil fem eller seks veker – så ver tidleg ute. Kan hende utanlandske statsborgarar må vise Skatteetaten at det ikkje er hindringar for giftarmålet i sitt eige land.

Merk at du må sjølv søke om attest. Gyldig prøvingsattest utferda i Noreg er eit absolutt krav, og dette dokumentet er berre gyldig i fire månader frå utferda dato. Ver merksam på denne tidsramma så du sender søknaden til Skatteetaten til rett tid.

Førebels vigselattest finn du her

– Kor mange par vi kan vie denne dagen, er sjølvsagt avgrensa, så meld deg på tidleg. Her gjeld prinsippet «først til mølla»! skriv Inger Eitrheim Johansen.

Om denne spesielle dagen!

Sola snur dagen etter, så dette er ein av årets lysaste dagar. Sola går ned litt etter klokka 23 og står opp rundt klokka 4. Vi håpar på ein varm og fin sommardag, men det kan vi sjølvsagt ikkje garantere. Alle må difor ta omsyn til risikoen for dårleg vêr og kle seg deretter. Hugs solid fottøy – det er ein lang tur til Trolltunga og ned igjen!

Vi gler oss til å møte dykk som ønskjer å smiast i Hymens lenker!

NB! Nedstigning etter solnedgang krev hovudlykt.

Du kan skifte til finare sko og antrekk i nærleiken av sjølve Trolltunga. To partytelt vil fungere som garderobar.

Vi oppmodar alle til å starte turen tidleg nok og bestille parkering på P3 Mågelitopp. Alternativt kan du bestille plass på skyttelbussen opp til P3 Mågelitopp.

Roald Aga Haug, ordføraren i Ullensvang kommune, vil vere til stades frå kl. 14 fredag 20. juni. Han gler seg til å vie fleire par på Trolltunga i år.
– Du kan sjølvsagt ha med forlovarar, men det er ikkje nødvendig. Dei som stiller frå Ullensvang kommune, kan vere vitne under seremonien, opplyser Inger Eitrheim Johansen, som er ansvarleg for all saksbehandling.

Ullensvang kommune tek ikkje betalt for sjølve vigselen. Andre utgifter må kvart par dekke sjølv. Vi reknar med at det òg i år vil vere ein fotograf til stades som tilbyr fotografering på Trolltunga. Avtale blir gjort mellom fotografen og brudeparet.

Kvelden før den store dagen held vi informasjonsmøte for brudepara på Trolltunga Hotel.

Takk for at du ønskjer å gifte deg i kommunen vår. Vi gler oss til bryllaupa på denne fantastiske staden!