Foto: Katya Graf

Gift deg på Trolltunga denne sommarnatta!

I sommar (2024) kan du gifte deg på Trolltunga. I år vert det midtsommar- og nattvigsel den 20.–21. juni – då er dagen lengst og natta kortast. Og då vert det bryllaup på den mest spektakulære fjellformasjonen i Noreg. Kan hende også din vigsel?

– Vi håpar på godt vêr, kveldssol og tidleg morgonsol, skriv Inger Eitrheim Johansen på nettsida til Ullensvang kommune. Det er kunngjeringa hennar vi i store trekk gjengir her. Interessert? Då må du melde deg på hos kommunen.

 

Foto: Katya Graf

Guida tur med overnatting

Du kan gjere bryllaupet ditt endå meir spesielt ved å ta ein guida tur med Trolltunga Active eller Trolltunga Adventures! Dette inkluderer overnatting på den flotte leiren deira ved Trolltunga.

Kva kan vel vere ein meir perfekt start på bryllaupsnatta? I fjelleiren vert det servert god mat og drikke frå lokale produsentar. Og du kan nyte ein vakker solnedgang rundt det knitrande bålet, om vêrgudane er snille. Om morgonen står frukosten klar.

Om du har spesielle ønske, ber vi deg ta kontakt direkte med guideselskapet. Dei vil gjere alt dei kan for at draumane dine skal gå i oppfylling! Men hugs å meld deg på tidleg.

Foto: Katya Graf

Du treng ein attest

Du må registrere deg hos kommunen og levere gyldig norsk prøvingsattest som viser at det ikkje er nokon hindringar for giftarmålet. Norske par får vanlegvis attesten sin raskt. Men viss den eine eller begge er utanlandske statsborgarar, kan det ta opptil fem eller seks veker – så ver tidleg ute. Kan hende utanlandske statsborgarar må vise Skatteetaten at det ikkje er hindringar for giftarmålet i sitt eige land.

Merk at du må sjølv søke om attest. Gyldig prøvingsattest utferda i Noreg er eit absolutt krav, og dette dokumentet er berre gyldig i fire månader frå utferda dato. Ver merksam på denne tidsramma så du sender søknaden til Skatteetaten til rett tid.

Førebels vigselattest finn du her

– Kor mange par vi kan vie denne dagen, er sjølvsagt avgrensa, så meld deg på tidleg. Her gjeld prinsippet «første par til mølla»! skriv Inger Eitrheim Johansen.

Foto: Åse Marie Evjen

Om denne spesielle sommarnatta!

Det vert solsnu (sommarsolkverv) mellom torsdag og fredag, 20.–21. juni. Då gler vi oss til å treffe dei som har lyst til å verte smidd i hymens lenker!

– Vi håper på ein varm og fin sommarnatt, men det kan vi sjølvsagt ikkje love. Alle må difor ta omsyn til risikoen for dårlegare vêr, og kle seg deretter. Det kan òg vere lurt å ha eit lite telt med seg. Hugs solid fottøy – det er ein lang tur fram til Trolltunga og ned att!

NB Nedstiging etter solnedgang krev hovudlykt.

Du kan byta til finare sko og finstas i nærleiken av sjølve Trolltunga. Eit telt vil tene som garderobe.

Vi oppmodar folk om å starte turen tidleg nok, og bestille parkering for to dagar oppe på P3 Mågelitopp. Alternativt kan du bestille plass på skyttelbussen opp til P3.

Roald Aga Haug, ordføraren i Ullensvang kommune, vil vere til stades frå kl. 17 torsdag den 20. juni. Han gler seg til å vie fleire par på Trollunga i år.

– Du kan sjølvsagt ha med deg forlovarar, men det er ikkje nødvendig. Dei som stiller frå Ullensvang kommune, kan vere vitne i seremonien, opplyser Inger Eitrheim Johansen.

Ullensvang kommune tar ikkje betalt for sjølve vigselen. Andre utgifter må kvart par dekke sjølv. Til dømes om det melder seg ein fotograf som tilbyr fotografering på Trolltunga, vert det ei sak mellom fotografen og brudeparet.

Kvelden før den store dagen held vi informasjonsmøte for brudepara på Trolltunga Hotel.

Takk for at du har lyst til å gifte deg i kommunen vår. Vi er stolte av denne flotte staden!

 

Ta kontakt med Ullensvang kommune

Inger Eirtrheim Johansen
E-post: inger.eitrheim.johansen@ullensvang.kommune.no

Mobil: +47 900 55 126

Roald Aga Haug, ordførar i Ullensvang kommune.
Foto: Yrjan Olsnes / Visit Hardangerfjord

Verdas første bryllaup på Trolltunga!

Det skal godt gjerast å finne ein vakrare og meir dramatisk stad å gifte seg! Ordføraren i Ullensvang, Roald Aga Haug, hadde i årevis drøymt om å vie nokon på Trolltunga. Laurdag 14. august 2021 fekk fire par vere dei fyrste til å gifte seg på Trolltunga.

Her kan du sjå bryllaupa!

Video:
Therese&Tor

Foto: Therese&Tor

Sara Johnson Melkeraaen
Foto: Yrjan Olsnes / Visit Hardangerfjord

Foto: Katya Graf

Foto: Katya Graf

Foto: Yrjan Olsnes / Visit Hardangerfjord

Foto: Yrjan Olsnes / Visit Hardangerfjord